Казат Акматов: Архат

 Экинчи балалык кыялыңызды мындай деп айткым келет. Клон өзү мурда табияттын өзүндө бар нерсе. Анын аты - реинкарнация. Бул жөнүндө да биздин храмдан толук билим аласыз. Ал эми Адам жашаган жер үстүндө адилеттик издөө биздин лама дининин эң негизги чакырыгы. Бул жагынан сиз бизге абдан туура келгенсиз. Жолунуз ачылсын. Атыңызды ким койгон?

Адилет дароо жооп бере албай такалып калды.

- Атымды ата-энем койгон. Бирок... Аты кандай шартта коюлганын айтсамбы же айтпасамбы деп бала арсарсый түштү. А Лама Цу болсо Адилеттин аты эмне үчүн мындай коюлганын билип тургансыйт. Ошон үчүн көздөрү күлмүндөп «бала өзү айтсын» деп күтүп турду. Акыры Адилет чыдаган жок, өзүнүн жашыруун жана ичине каткан ачуу чындыгын айтып жиберди:

- Мени ата-энем «керексиз», «артыкбаш» туулгансың деп урушат.

 - Ха-ха-ха! Эң тура. Ата-энениз болгонун айткан! Сиз ал жакта керексиз адамсыз. Сиз биздин жерде туулуш керек болчусуз. Реинкарнацияда мындай жаңылыштык боло берет. «Эски, дат баскан селкинчектин үнү мени дайыма чакырчу», — деген сөзүңүздүн өзү бизде «калагия» деп аталат. Ал чакырык аба менен тарайт, же болбосо телепатия жолу менен жиберилет. Ал деген Шамбаланын үнү, же болбо со чакырыгы. Кыскасы, уулум, сиздин бардык маалыматтарыңыз туура чыкты. Сиз Улуу Мистериянын өзү жараткан адамысыз, сиз анын туура жолуна келди низ. Бир аз гана кечирээк келдиңиз. Жети жаш эң туура болмок. Бизде он бир жаш чоң адам деп эсептелет. Бул жаштагы адам менен «Сиз» деп сүйлөшөбүз. Бирок бардыгына үлгүрөсүз деп ишенем. Ал үчүн күнү-түнү дебей билим аласыз. Лама Цу баланы ушунчалык элжиреп карады:

 - Эгер мага ишенсеңиз мен өзүм сизге насаатчы болоюн.

 -Сөзсүз ишенем!, - деген сөздү Адилет шаша сүйлөдү. Анткени Лама Цунун күмүш сындуу жаркыраган мээрин бала биринчи эле жолукканда көргөн жана дайыма көрүп турчу. Аны чанда гана бир адамдан байкачу. Жылдыз эжейи, анан мына, Тибеттеги жаңы таанышкан картаң Лама. Ал түгүл байкеси Таштандын мээри күңүрт.

- Анда эмесе Шамбаланын паролун сизге айтып коёюн, Адилет уулум: «Сергек акыл, жалын жүрөк, темирдей эрк!». Мына ушул үч касиет сизде барбы деп сиз менен бир күн кечке сүйлөштүм. Өкүнгөн жокмун, уулум!

Ушуларды айткандан кийин Лама Цу кандайдыр бир өзгөчө сыр сурачудай Адилетке күлмүндөдү

- Кыздарга ашык боло элек белеңиз, Адилет уулум?

Адилет капыстан колго түшкөндөй кызарып кетти. Же калп айта албай, же чынын айта албайт. Эгер чынын айтса «Иэзабель» лицейинде бир жыл бир партада отуруп чогуу окуган Шоола аттуу кызды айтыш керек эле. Анткени ал кыздын карагаттай мөлтүрөгөн ойноок көздөрү Адилеттин басса-турса эсинен кетпей кыйнап жүргөн болчу. Анысын эч бир жанга айткан эмес, айта да албайт эле. Ал түгүл Таштан досуна лам деген эмес. Шоола бардык убакта тартынбай эле Адилетке болушуп, атүгүл кыздар менен айтыша кетип турчу. Бир сапар ал Адилетти шылдындап аткан кызды жыга түртүп да жиберген.

Окуя спорт залдын ичинде болду эле. Жыгылган кыз ыйлап мугалимге барып даттанган. Мугалим ошол күнү Шоолага тартиби үчүн «эки» деген баа койгон.

Адилет бул окуяга катуу кайгырып, көп күндөр Шооланын көзүн карай албай күнөөлүү болуп жүрдү. Ошондон баштап ал экөөнүн ортосунда балалык сүйүү башталган болуш керек, себеби Шоола эми Адилетке баягыдай ачыктан-ачык кыздар менен айтышып болушпай, кандайдыр оолактап, алыстан тымызын тиктеп, Адилет карай калса көзүн ала качат. Бир нече күн Адилет да кызга жолобой алыстап калды. Ошого карабастан классындагылар экөөнө «кыз-күйөө» деген шылдың ат коюшту, доскага, дубалдарга жазышты. Экөөнүн ортосун алыстатууга кыздар бар болгон аракеттерин бүт жасашты. Акыры экөөнү эки башка партага отургузуп тынышты. Ошентип кыздар көктөн тилеген максатына жеткендей болгон. Бирок канча кылса да адамдагы бул ээ-жаа бергис табийгый азоо сезим өз ишин кылбай коёбу, акыры жүрүп окуу жыл аяктаганда, бүт классы менен эстелик сүрөткө түшүп атканда Адилет бар кайратын жыйнап туруп Шоолага түз басып барды да, кыздардын көзүнчө эле үч тал гүлдесте сунду. Шоола бир аз такала түшүп андан соң башын бийик көтөрдү да, гүлдестени алып туруп четке басып кетти. Эки бети от болуп күйгөнүн жашырышка аракет кылды. Ошонун айынан сүрөткө тизилгенде экөө таптакыр эки башка туруп калышкан болчу. Адилет эң арткы катардагы сол четинде, Шоола болсо биринчи катардын оң четинде. Ушул тагдырына Адилет ичинен сызып жүрчү. А өзүнчө сүрөткө түшүүгө ал Шооланы чакыра алган жок. Сүрдөдү. Бирок акыры башка айла тапкан болчу. Сүрөттөгү өзү менен Шооланын элесин ультрафиолет нурга кармап бир аз кызгылтым кылып алган. Ал сүрөттү ким караса да Адилеттин сырсандыгы дароо эле ачылып калмак! Тибетке жөнөгүчө Адилет кызга телефон чала албай көп күндөр кыйналды, уйкусуз түндөрдү өткөрдү. Акыры тобокел кыла турган мүнөт да келет экен, кыздын чөнтөк телефонуна чалды.